|
Höfundur: Tryggvi Jónsson
|
|
Miðvikudagur, 12. maí 2010 18:25 |
|
Valsarar.is eru komnir í sumar fluggírinn
Ókei, Íslandsmótið er hafið og valsarar.is eru að vakna af værum blundi. Fyrirfram hefði 2-2 jafntefli við Íslandsmeistara FH þótt ágætis úrslit í fyrstu umferð en miðað við spilamennsku liðanna er ekki laust við að Valsarar geti leyft sér að vera pínu súrir með niðurstöðuna.
Stjórn Vals ásamt þjálfara liðsins er búin að stokka rækilega upp og segja má að okkar menn séu eitt risastórt spurningamerki eftir vetrar tiltektina. Ekkert bólaði á gömlum jálkum eins og Helga Sig, Arnari Gunnlaugs og Mareli Baldvins (og Bjarna Ólafi) eða hvað þeir hétu allir en í staðinn eru komnir nokkrir sprækir kappar en þó í bland við burðarása eins og Kjartan, Atla Svein, Reyni Leós, Baldur Ingimar að ógleymdum Sigurbirni Hreiðars.
Það mátti sjá strax á upphafsmínútunum að Valsliðið sem mætir til leiks í ár er allt annað en það sem lauk Íslandsmótinu í fyrra með skömmustulegri frammistöðu gegn KR. Enginn í liðinu virðist líta of stórt á sig og allir eru tilbúnir að leggja sig fram fyrir hvorn annan. Eitthvað sem var ansi sjaldgæf sjón síðustu tvö tímabil en nóg um samanburðin við þau rándýru flopp lið. Mótið 2010 er hafið og allt sem gerðist í fortíðinni er komið ofan í kassa með hinu dótinu enda er það venjan að horfa fram á við á Hlíðarenda fremur en að dvelja of lengi í fyrri tíð.
Meira en stór fiskur í lítilli tjörn?
Okkar menn fengu stórveldi 21. aldarinnar í heimsókn og fyrirfram var vart hægt að hugsa sér erfiðari andstæðing í 1. umferð. FH-liðið mætti hins vegar laskað til leiks og fjórir til fimm byrjunarliðsmenn frá því á síðasta ári voru meiddir og brotthvarf Davíðs Þórs og Tryggva Guðmunds á eflaust eftir að taka sinn toll af meisturunum. Ef FH hefur einhvern tímann legið vel við höggi þá var það nú.
Eitt af einkennum Hafnarfjarðarrisans er að menn eru orðnir ansi rútíneraðir í sinni leikaðferð og flest allir leikmenn liðsins eru öruggir á boltann. Það þekkja allir sitt hlutverk í liðinu og það sem FH gerir öðrum íslenskum liðum betur er að halda tuðrunni innan liðsins á meðan flestum leikmönnum annara félaga er mjög tamt að negla fram undir eins. Ekkert íslenskt lið getur leikið þessa aðferð FH-inga eftir með góðu móti og því svo sem ekkert vit í að reyna að spila samskonar leik og þeir. Valsmenn gáfu FH-ingum því lítinn tíma til athafna og voru fljótir að keyra á þá í sókninni enda hraðinn orðinn mun meiri fram á við með tilkomu Arnars Sveins og Danni Köning.
Eftir rúman hálftíma leik var ísinn brotinn með marki frá danska framherjanum sem nýtti færi sitt vel gegn Gunnleifi landsliðsmarkverði. Við þetta mark má segja að FH-ingar hafi vaknað til vorsins og settu þeir allt í gang. Kjartan gerði vel að verja rétt eftir markið en aðeins fáum andartökum síðar var boltinn kominn í net Valsmanna þegar rangstöðugildran brást eftir vippusendingu. Glæsilegt mark svo sem en engu að síður hefði vel mátt koma í veg fyrir þetta. FH-ingar voru ekki langt frá því að komast yfir fyrir leiklhlé en Valsmenn héldu út og voru eflaust flautunni fegnir.
Fimleikafélagið hefur staðið öðrum framar í fótbolta síðustu árin
Í síðari hálfleik virtust Valsmenn vera með undirtökin án þess þó að yfirspila FH að neinu ráði. Miðjumenn Vals áttu í litlum erfiðleikum með starfsbræður sína í FH liðinu og það má vel setja efasemdir fram um hversu verðugur arftaki Herra Fjölnir er að miðjustöðunni sem Davíð Þór Viðarsson skildi eftir sig. Það er spurning hversu mikla þolinmæði Mafían hefur gangvart þessum nýja liðsmanni sem skapaði sér nafn í neðrideildunum og á aðeins tvö tímabil í úrvalsdeild að baki. Valsliðið er aftur á móti enn í talsverðri mótun og ekki sama pressa á titilbaráttu í ár á Hlíðarenda og í Kaplakrika og líklegra að það sé aukið pláss fyrir mistæka nýliða.
Eftir að Arnar Sveinn kom Val í 2-1 leit þetta virkilega vel út og Fimleikafélagið virtist ekki vera með nein svör að ráði við leikaðferð Knattspyrnufélagsins. Allt þar til að það fann þau hjá Kristni Jakobssyni dómara leiksins. Þegar rúmar 10 mínútur voru til leiksloka bjargaði Kristinn stigi fyrir gestina með algjöru gjafavíti. Dómari sem er hampað þetta mikið fyrir sína meintu getu á einfaldlega ekki að falla fyrir svona svindli. Sumum finnst kannski bara gaman að láta plata sig en þannig fólk á að halda sig á sýningum hjá Bjarna töframanni en ekki dæma fótboltaleiki.
Það er síðan furðulegur ávani hjá Kristni að gefa mönnum alltaf gult spjald um leið og hann flautar vítaspyrnu, eins og það eigi að undirstrika hversu viss hann er í sinni sök. Í þessu tilfelli er augljóslega engin brotavilji hjá Reyni og Matthías er að senda boltann út úr teignum, ekki í átt að marki og í alls engu skotfæri. Það voru talsvert alvarlegri brot hjá báðum liðum í þessum leik sem hefðu verðskuldað spjald en þetta er greinilega einhver taktík hjá Kristni, kannski hugsað til að koma í veg fyrir mótmæli. Martin Pedersen lenti meðal annars í ryskingum þegar FH-ingar vildu meina að hann hefði traðkað ofan á Gunnari Má sem hafði átt vægast sagt klaufalega tilraun til tæklingar á hann. Báðir hefðu réttilega átt að fá bókun en greinilegt er að Martin er enginn aukvissi og lætur engan eiga neitt inni hjá sér.
Sumum finnst gaman að láta plata sig
Gunnar Már skoraði síðan úr spyrnunni en það hafa eflaust verið Kjartani vonbrigði að gera ekki betur enda var hann kominn í rétt horn og spyrnan virkaði ekkert alltof örugg. Hvorugt liðið lagði allt í sölurnar til að ná í öll þrjú stigin en Ólafur Páll Snorrason var næst því að skora en brást bogalistin eins og svo oft áður þegar hann kemst í hættulega stöðu.
Leikmenn Vals voru flestir að standa fyrir sínu og gaman að sjá liðið vera orðið þess fært að sækja hratt á andstæðinga sína að nýju. Haukur Páll Sigurðsson stimplaði sig heldur betur vel inn í liðið en hann virðist mikið leiðtogaefni sem gefur ekki þumlung eftir, skilar boltanum vel til samherja og er duglegur að hvetja menn áfram. Það er vert að gefa þessum pilti gaum í sumar.
Kristinn Jakobsson verður seint talinn í uppáhaldi hjá Völsurum og hann náði sér í enn einn mínusinn í kladdanum okkar. Það er með hálfgerðum ólíkindum hversu oft við fáum á okkur dóm hjá Kristni sem orkar tvímælis á meðan við virðumst aldrei njóta vafans þegar hlutirnir gerast í vítateig andstæðinganna. Auðvitað er lítið mál að afgreiða þetta sem hvert annað væl eins og oft vill gerast í íslenskri umræðuhefð en þetta verður vægast sagt ergilegra með hverju skiptinu hjá honum. Vonandi var þetta síðasta vafasama vítið sem Kristinn dæmir á okkur og þá geta allir unað sáttir.
Nýjir vendir sópa best
Fyrstu einkennin á handbragði Gunnlaugs Jónssonar er sterk og góð liðsheild þar sem menn ætla að berjast fyrir hvorn annan. Það er ekki hægt að segja að neinn stjörnufans sé yfir liðinu enda áttu margir leikmenn sitt versta tímabil á ferlinum í fyrra og flestir nýliðarnir lítt þekktar stærðir í íslensku deildinni. Þetta er auðvitað ekkert samansafn af tombólu leikmönnum heldur en fyrsti leikur Íslandsmótsins gefur í það minnsta góð fyrirheit og vonandi getum við Valsmenn byggt ofan á þetta innan vallar sem utan.
Stemmningin í stúkunni var prýðileg, um 1800 manns mættir í fullsetna stúku og gott betur. Þó nokkrir komu í grill við Fjósið og það verður vonandi enn meira stuð þar þegar þær áætlanir sem upp eru um nýtingu hússins komast í framkvæmd. Nánar að því síðar.
|
|
|
Byrjum á Íslandsmeisturunum |
|
Höfundur: Tryggvi Jónsson
|
|
Mánudagur, 10. maí 2010 17:21 |
|
Það er ekki seinna vænna að hrista af sér slenið. Íslandsmeistarar FH mæta á Hlíðarenda í fyrstu umferð. Sorry, ég meinti Vodafonevöllinn.
|
|
Hefur þú eitthvað að segja? |
|
Höfundur: Valsarar.is
|
|
Mánudagur, 22. mars 2010 15:00 |
Er eitthvað sem þér liggur á hjarta varðandi Knattspyrnufélagið Val sem fær ekki réttan farveg? Brennur þú innan í þér en ert kominn með leið á að hlusta á Eyþór Arnalds og Todmobile?
Valsarar.is leita að beittum pennum til að skrifa um kappleiki, menn, mýs og málefni sem tengjast Hlíðarendastórveldinu.
Áhugasamir hafið samband með því að senda póst á letrix hjá gmail punktur com.
|
|
Höfundur: Valsarar.is
|
|
Miðvikudagur, 09. desember 2009 19:52 |
|
Nárameiðsli hafa plagað Garðar undanfarið
Garðar Gunnlaugsson var í viðtali í útvarpsþættinum Fótbolti.net á X-inu á laugardag. Viðtalið er um margt áhugavert og hægt er að nálgast þáttinn í heild sinni hér: http://www.fotbolti.net/05122009.mp3
Eiginmaður Ásdísar Rán ræddi meðal annars hugsanleg félagsskipti til Vals í þættinum. Af ummælum hans að dæma virðist kappinn ekkert alltof spenntur fyrir að koma heim og spila á Hlíðarenda en hugur hans virðist liggja alls staðar annars staðar en á Íslandi. Jafnvel Katar kemur til greina fremur en rokið á Klakanum.
Garðar segist vera með tilboð frá liði í sænsku B-deildinni en hann náði góðum árangri þar með IFK Norrköping og skoraði 30 mörk í 45 leikjum. Það er ekki nokkur spurning að Valur hefur þörf fyrir iðinn markaskorara en aftur á móti er spurning í hvaða ástandi Garðar er eftir vistina í Búlgaríu. Á meðan dvöl hans hjá CSKA Sofiu stóð lék hann ekki nema fimm leiki og glímdi við nárameiðsli nær allan sinn tíma á Balkanskaganum. Sigurvegari Herra Ísland keppninnar árið 2003 þarf að sanna getu sína á nýjan leik en spurningin er hvort það verður Pefsí-deildin eða Superrettan sem verður fyrir valinu.
Garðar Gunnlaugsson var í viðtali í útvarpsþættinum Fótbolti.net á X-inu á laugardag. Viðtalið er um margt áhugavert og hægt er að nálgast þáttinn í heild sinni hér: http://www.fotbolti.net/05122009.mp3
Eiginmaður Ásdísar Rán ræddi meðal annars hugsanleg félagsskipti til Vals í þættinum. Af ummælum hans að dæma virðist kappinn ekkert alltof spenntur fyrir að koma heim og spila á Hlíðarenda en hugur hans virðist liggja alls staðar annars staðar en á Íslandi. Jafnvel Katar kemur til greina fremur en rokið á Íslandi.
Garðar segist vera með tilboð frá liði í sænsku B-deildinni en hann náði góðum árangri þar með IFK Norrköping og skoraði 30 mörk í 45 leikjum. Það er ekki nokkur spurning að Valur hefur þörf fyrir iðinn markaskorara en aftur á móti er spurning í hvaða ástandi Garðar er eftir vistina í Búlgaríu. Á meðan dvöl hans hjá CSKA Sofiu stóð lék hann ekki nema fimm leiki og glímdi við nárameiðsli nær allan sinn tíma á Balkanskaganum. Menn lifa bara visst lengi á fornri frægð og ljóst er að sigurvegari Herra Ísland keppninnar árið 2003 þarf að sanna getu sína á nýjan leik.
|
|
Aftur tekur Eiður Börkinn |
|
Höfundur: Tryggvi Jónsson
|
|
Föstudagur, 04. desember 2009 16:53 |
|
Á dögunum ræddu Valsarar.is um það þegar Eiður Smári og Höddi Magg tóku Börkinn og tjáðu sig sitt á hvað um mál sem ansi fáir höfðu áhuga á. Eiður virðist ekki hafa farið eftir föðurlegum ráðleggingum síðunnar heldur er hann aftur farinn í fjölmiðla með mál sem hefði fjarað fljótt út ef Eiður hefði látið kyrrt liggja.
Út í hinum stóra heimi er talað um Barböru Streisand áhrifin þegar kemur að svona málum. Í stuttu máli þá útskýrast þessi áhrif á þann veg að ef reynt er að þagga niður vandræðalegar fréttir þá fá enn fleiri áhuga á þeim heldur en ef menn hefðu einfaldlega vit á að tjá sig ekki.
En Eiður Smári sem hefur verið með dýrasta spunameistara landsins, Eggert Skúlason, í vinnu fellur beint í gamalkunnar gildrur. Eflaust veldur það uppnámi að sjá slæma forsíðumynd af sér en þetta eru ekki flókin fræði. Svo vitnað sé í ritsjóra Morgunblaðsins: "Þegar þú ert kominn ofan í holu, hættu þá að moka."
|
|
Höfundur: Valsarar.is
|
|
Þriðjudagur, 01. desember 2009 13:37 |
|
Í tilefni af því að desember er kominn er ekki úr vegi að minna okkur á að bráðum tekur við betri tíð með hækkandi sólu. Ef einhverjir Valsarar eru að tapa sér í skammdeginu þá er ekki úr vegi að rifja upp ánægjulegri tíma heldur en síðasta leikár í fótboltanum. Eftirfarandi eru myndbönd af mbl.is þegar Valur var að tryggja sér titilinn 2007. Njótið.
Viðtöl eftir leik FH og Vals í 17. umferð árið 2007
Viðtöl eftir leik Vals og HK í 18. umferð árið 2007.
|
|
|
|
|
<< Fyrsta < Fyrri 1 2 3 4 5 6 7 8 9 10 Næsta > Síðasta >>
|
|
Síða 7 af 22 |
