Næsti leikur meistaraflokks karla er á martraðarvelli Vals -Kópavogsvelli. Blikar taka á móti okkur en þess ber að geta að Valsmenn náðu langþráðum deildar sigri gegn Breiðabliki á síðasta tímabili. Aftur á móti töpuðum við fyrir HK og einnig slógu Blikar okkur úr bikarnum á vellinum alræmda. Leikar hefjast klukkan 20.00 og hinir vafasömu sófa Valsarar vita líklegast að leikurinn er í beinni á Stöð 2 Sport. Menn verða því löglega afsakaðir með að mæta ekki í Kópavoginn, þótt það sé auðvitað með öllu siðlaust og viðkomandi til háborinnar skammar. En annað eins gengur nú á í Vogi kópsins um þessar mundir þannig að léleg mæting að hálfu Valsara mun fljótt falla í gleymsku. Vonandi.

Valur dróst gegn Álftanesi í 32-liða úrslitum bikarkeppninnar í ár. Þetta ætti að geta orðið nokkuð þægilegur leikur fyrir okkar menn en Álftanes afrekaði að slá út 1. deildar lið ÍR í síðustu umferð. Knattspyrnufélagið Valur hefur ekki unnið bikarkeppnina síðan 2005 og er löngu kominn tími á 10 bikarinn á afrekaskrá meistaraflokks karla.

Hinn árvissi viðburður knattspyrnusumarsins er þegar einhver stuðningsmannahópur fær skömm í hattinn. Nú hefur þessi viðburður átt sér stað. Á internetinu logar allt í fólki sem móðgast sárlega fyrir hönd Hauks Inga og Ragnhildar Steinunnar. Allt vegna þess að einhverjar Garðabæjargelgjur voru að reyna að vera fyndnar á fótboltaleik. Eftir að hafa heyrt textann er ég ekki alveg að skilja hvar stóri skandallinn liggur. Kíkjum á þetta:

Valsarar voru mættir á Hlíðarenda í kvöld til að sjá sína menn taka á móti Þrótturum.  Fyrir leikinn voru Valsmenn með sjö stig en Þróttarar með tvö.  Leikurinn var síðasti leikurinn í hraðmótinu, eins og fyrstu umferðir Íslandsmótsins eru oft kallaðar, áður en landsleikjahléið skellur á og mikilvægt að fara inní það með sigri.

Valur vann mikilvægan 2-1 sigur gegn 10 leikmönnum Þróttar í kvöld. Segja má að Valsmenn rétt hangi inni í kapphlaupinu við FH sem byrja mótið með stæl enn eitt árið. Umfjöllun um leikinn kemur um hádegisbilið en þangað til er lesendum frjálst að skrá inn athugasemdir.